Saatlıda bir qrup şəxs yolu bağlamağa cəhd etdi – Saxlanılan var

Bu gün saat 14 radələrində Saatlı rayonunun Orta Muğan və Nabatkənd kəndlərinin bir qrup sakini içməli su probleminə öz narazılıqlarını bildirmək məqsədilə magistral yolunu bağlamağa cəhd ediblər.

Bu barədə Daxili İşlər Nazirliyinin mətbuat xidmətindən bildirilib.

Əraziyə gələn rayon polis şöbəsinin əməkdaşları, rayon İcra Hakimiyyətinin və Meliorasiya və Su Təsərrüfatı Açıq Səhmdar Cəmiyyətinin nümayəndələri onlarla izahedici söhbətlər aparıblar.

Bundan sonra sakinlərin əksəriyyəti geri qayıtsalar da bir qrup şəxs polisin qanuni tələbinə əməl etməyərək ictimai asayişin pozulmasına yönəlik qanunsuz hərəkətlərini davam etdiriblər.

Onlar saxlanılaraq rayon polis şöbəsinə gətiriliblər.

Hazırda araşdırmalar aparılır.