Bakıda yeraltı ticarətə qadağa: söküntü başladı
Bakıda keçiriləcək Avropa Olimpiya oyunlarına görə, paytaxtın yeraltı keçidlərində fəaliyyət göstərən köşklər sökülür.
Ancaq bəzi hökumətyönlü media söküntünün səbəbini sakinlərin buradan rahat istifadə edə bilməməsi ilə əsaslandırır.
Arqument.az-a məlumat verən satıcılar bunun şayiə olduğunu, söküntünün yayda keçiriləcək olimpiya oyunları ilə bağlı olduğunu deyirlər.
Belə ki, metronun “28 May” stansiyasının yaxınlığında yerləşən yeraltı keçiddə ticarət köşkləri Bakı Şəhər İcra Hakimiyyətinin məsul şəxslərinin gəlişindən sonra sökülüb.
“Bizə dedilər ki, olimpiya oyunlarına görə belədir. Bunları havayı verməyiblər, pul ödəyərək köşk tikmişik”, – deyə ticarətçilər bildiriblər.
Füzuli meydanının qarşısında yerləşən yeraltı keçiddəki ticarət köşkləri sökülən sahibkarlar da Arqument.az-a bildiriblər ki, bütün bu oyunlar olimpiya oyunlarına görədir: \”4 giriş-çıxışı olan piyada keçidinin bir hissəsindəki alış-veriş məntəqələri sökülür. Rəflər dağıdılır, mallar isə sahibləri ilə birlikdə keçiddən çıxarılır\”.
