Gündəm

Vahid Əhmədov: \”Azərbaycanda vəziyyət belə davam edə bilməz\”

Vahid Əhmədov: "Azərbaycanda vəziyyət belə davam edə bilməz"
“Banklar ya bağlanmalı, ya da Mərkəzi Bankın tövsiyəsi əsasında iri banklar yaradılmalıdır”

“Azərbaycan bank sistemində çox ciddi problemlər yaşanmaqdadır”. Bunu modern.az saytına Milli Məclisin İqtisadi siyasət komitəsinin üzvü Vahid Əhmədov deyib.

O, qeyd edib ki, manatın devalvasiyası, vaxtı keçmiş kreditlərin həcminin artması bu problemlərin yaranmasına və dərinləşməsinə səbəb olub: “Ümumiyyətlə, bank sisteminin ciddi islahatlara ehtiyacı var və islahatlara çoxdan gedilməli idi.

Azərbaycanda banklar birləşməli, iri banklar yaradılmalıdır. Bankların dövri vəsaitlərinin, likvidliyinin olması, kredit faizlərinin aşağı salınması vacib amillərdəndir. İslahatlar çoxdan aparılmalı idi ki, banklar bu cür aqibəti yaşamasın.

Son vaxtlar Mərkəzi Bankın İdarə Heyətində müəyyən addımlar atılsa da, həyata keçirilənlər o qədər də qaneedici deyil. Uzun müddətdir bank sistemində islahat aparılmır. Bunun nəticəsidir ki, həddindən artıq xırda banklar peyda olub. Həmin banklar əmanətləri çox aşağı faizlə qəbul edir, amma krediti yüksək faizlə verir”.

Vahid Əhmədov bildirib ki, bankların sayı azalmaqda davam edəcək: “Problemlər çoxdur. Azərbaycandakı 46 bankdan 43-ü fəaliyyətini davam etdirir. Bankların sayının çox olması əslində müsbət haldır. Amma Azərbaycanda vəziyyət bu cür davam edə bilməz. Banklar ya bağlanmalı, ya da Mərkəzi Bankın tövsiyəsi əsasında iri banklar yaradılmalıdır. Əvvəllər nizamnamə kapitalı 10 milyon manat idisə, hazırda bu 50 milyon manatla ölçülür. Bir sözlə, islahat getməlidir, bu labüddür”.

İqtisadçı-mütəxəssis deyib ki, nə qədər çox bank, alternativ variantlar olarsa, o qədər yaxşıdır: “Amma nəzərə almaq lazımdır ki, bankların yaşaması üçün vəsait olmalıdır. Azərbaycanda Beynəlxalq Bankı, “Kapitalbank” , “Paşa Bank” kimi 20-25 bankın olması kifayət edir”.

Xatırladaq ki, avqustun 10-da Azərbaydanda daha bir bank – “EvroBank” Açıq Səhmdar Cəmiyyəti 1 saylı Bakı İnzibati-İqtisadi Məhkəməsinin qərarı ilə müflis elan edilib.

Loading...
reklam...

Bənzər Yazılar

Bir cavab yazın

Sizin e-poçt ünvanınız dərc edilməyəcəkdir.

Back to top button