İrəvandakı “sxodka”ya uçmaq istəyən “vor zakon” həbs edildi
Rusiya sərhədçiləri Ermənistana uçmaq istəyən kriminal avtoritet Aleksey Qudınanı Rostov-Don şəhərinin aeroportunda həbs ediblər.
Virtualaz.org saytı xəbər verir ki, A.Qudına Ermənistan paytaxtna saxta pasportla getməyə çalışırmış.
Rusiya Dövlət Sərhəd Xidməti mətbuat xidmətindən verilən məlumata görə, “Lexa İrkutski” ləqəbli kriminal avtoritet Aleksey Qudına “vor zakon”ların bu günlərdə İrəvanda keçirilən “sxodka”sına başqa adamın pasportu ilə uçmaq istəyərkən yaxalanıb.
Hazırda “qanuni oğru”ya qarşı sərhədi qanunsuz olaraq keçmə maddəsi ilə ittiham irəli sürməyə hazırlıq gedir.
A.Qudına 2004-cü ilin fevralında Peterburq türmələrində aclıq aksiyasını qızışdıran şəxs kimi tanınır. Həmin aksiyada 100-dən çox məhkum iştirak edib. 2001-cii ldə isə Qudına özünün ölüm səhnəsini quraşdırıb. O, cinayət təqibindən yayınmaq üçün belə edib. Qudına artıq 14 ildir ki, saxta sənədlərlə yaşayır.
Yada salaq ki, yanvarın 6-dan etibarən Ermənistanda son onilliklərin ən böyük “oğru sxodkası” keçirilir. Qudınanın məhz həmin tədbirə qatılmaq üçün getdiyi istisna deyil.
